కేరళలో భారీ వర్షాలు: 8 జిల్లాల్లో విద్యా సంస్థలకు సెలవు

కేరళలో భారీ వర్షాల హెచ్చరికల నేపథ్యంలో ఎనిమిది జిల్లాల్లోని విద్యా సంస్థలు నేడు మూతపడ్డాయి. భారత వాతావరణ శాఖ అత్యంత భారీ వర్షాలు కురుస్తాయని అంచనా వేయడంతో పత్తనంతిట్ట, అలప్పుజ, కొట్టాయం, ఎర్నాకుళం, త్రిస్సూర్, వయనాడ్, కన్నూర్, కాసరగోడ్ జిల్లాల కలెక్టర్లు ఈ మేరకు మూసివేత ఆదేశాలు జారీ చేశారు.

ఈ సెలవుతో పాఠశాలలు, కళాశాలలు, వృత్తి విద్యా సంస్థలు, అంగన్‌వాడీలు, ట్యూషన్ సెంటర్లు, కోచింగ్ ఇన్‌స్టిట్యూట్‌లతో సహా అన్నీ మూతపడ్డాయి. అయితే, ముందుగా నిర్ణయించిన పబ్లిక్, యూనివర్సిటీ పరీక్షలు, ఇంటర్వ్యూలు యథావిధిగా జరిగినట్టు తెలుస్తోంది. వయనాడ్, కన్నూర్ జిల్లాల్లోని రెసిడెన్షియల్ సంస్థలకు కొన్ని మినహాయింపులు ఇచ్చినప్పటికీ, విద్యార్థుల భద్రతకు సంబంధించి అన్ని రకాల చర్యలు తీసుకోవాలని ఆదేశించారు.

ఐఎండీ పలు జిల్లాలకు ఆరెంజ్, మరికొన్ని జిల్లాలకు ఎల్లో అలర్ట్ జారీ చేసింది. పత్తనంతిట్ట, కొట్టాయం, ఇడుక్కి, వయనాడ్ సహా ఎనిమిది జిల్లాల్లో 24 గంటల్లో 115.6 మి.మీ నుంచి 204.4 మి.మీ వరకు వర్షపాతం నమోదయ్యే అవకాశం ఉందని పేర్కొంది. మరోవైపు, భారత జాతీయ సముద్ర సమాచార సేవల కేంద్రం కూడా తిరువనంతపురం, కొల్లాం, అలప్పుజ తీరాల్లో 'కల్లక్కడల్' (ఉవ్వెత్తున ఎగిసిపడే అలలు) ముప్పు ఉందని హెచ్చరించింది. మత్స్యకారులు, తీరప్రాంత ప్రజలు అప్రమత్తంగా ఉండాలని ఈ సందర్భంగా సూచించింది.

ఆగస్టు మొదటి వారంలో కురిసిన కుండపోత వర్షాలకు రాష్ట్రంలో వరదలు సంభవించి, కొండచరియలు విరిగిపడటంతో సుమారు 11,000 మందికి పైగా ప్రజలు ప్రభావితమయ్యారు. ఐఎండీ గణాంకాల ప్రకారం ఆగస్టు 1 నుంచి 3వ తేదీ మధ్య కేరళలో సగటు వర్షపాతం 184.2 మిల్లీమీటర్లుగా నమోదైంది. ఇక్కడ సాధారణంగా కురిసే 55.4 మిల్లీమీటర్ల వర్షపాతం కంటే ఇది 232 శాతం అధికం. ఈ పరిణామాల దృష్ట్యా యంత్రాంగం అన్ని ముందస్తు జాగ్రత్త చర్యలను చేపడుతోంది.